Luke 24

1To moite beren te hitieri no holoŋ te isabit, afanu isieja de ilume eyani hosie hitiŋwojita innafa lehuhumak isieja. 2Ette isieja arrumu morwo etiŋhatini ade tere ilume. 3Ajiŋak isieja a hotwai. Hati obe kwan na Habu Yesu.

4 5Oweta isieja de odule hililiha hirro inne, ojo huwo lohorik illo opipiak boŋojin innohosie ette hidwoŋ. Hati abaŋi ŋorwo ette hiluŋuro afau, eijo isieja do ŋorwo, “Ŋai le lisiaha itai hawarani te hiji ha hayok”

6 7Obe inyeja teni, hati aŋeibuhu! Itigilu hirro innafa lero inyeja dahatai nafa halarrasa inyie da Galileya. Ojo eiso iso Lenyi tihoni ta has ho heyak, esihohini iso inyeja ojo da halu ho holoŋitek hunik ebuhu iso inyeja inyiak do wuaran.

8Agilu ŋorwo hiro nafa ero inyeja. 9Acohini isieja teilume ette ŋelimak hirro inne daŋ to hejufak iko huwo illamuk daŋ. Ara ifa ŋorwo inia Mariya Madalinna, Juana, 10ojo Mariya hotonye Jemis, ojo isia ho ŋorwo hinnak ette ŋelimak hirro nuha daŋ to hejufak illo Yesu.

11Hati egigillo ifa hejufak luha hijo obe hiram ne ara dede, ette isieja enyiei leruk to hiram nia tara hosie. 12Hati odiote ifa Peturu ahide, enyior ailume, owetia, ette riŋai ahotwai. Ewolo inyeja boŋo lowuon de, ette Peturu ŋacohari ahaŋ honyie, eliliha hijo heidoŋ mahu nyo.

13Ette hilak lohorik efie da far nyie a doŋe nyie lara Emmaus, nafa lara maili ile to Yerusalem. 14Ero isieja do kwaite innohosie hirro daŋ innafa liedoŋ.

15Ifa lero isieja to kwaite innohosie ette Yesu alotohini daŋ hosie. 16Hati owolo isieja inyeja hati obe eremik ahieru inyie.

17Ojo Yesu dohosie, “Iro itai lohorik nyo do kwaite innahataiŋ” ette isieja weita ille lejiriŋa. Lobo lohose lafa lara fure Kiliopas, efi inyeja hijo, 18“Hira iye lobo ahatamononi inni to Yerusalem lobe liyen hirro hunna lerota huwo do holoŋi”

19Eijo Yesu do hosie, “Hara nyoŋ” Etiraŋ isieja do honyie, “Saye inno Yesu lo Nasarit, lafa lara hekilani, lologol binno ara inyeja Hiro lo Hollum ojo hidofe bi daŋ to huwo. 20Lafa esio eittaha illo iklesia iko hekumok hijo hotottohoi huwo inyeja hotoyo ette ŋesihok inyeja.

21Egigillo ifa iyohoi hijo ottu iso inyeja ahek huwo ille Israile. Te inne daŋ era holoŋitek hunik iyane ta nafa ebarari hirro inne.

22Hati ŋorwo hinnak innohoi etubur iyohoi nyo eba ifa isieja de ilume to moite beren. 23Ifa lobe isieja arrumu kwan nohonyie, afanu isieja ojo ewolo isieja rijori no anjillo lafa lojo owuar inyeja. 24Ofwo ifa hilak lewa illohoi ailume loriŋari ette ŋarrumu dede iya nafa elimahini hito noŋorwo ne. Hati obe ifa isieja egonyu inyeja.

25Ejio Yesu do hosie, “Itai hullo munaŋak ojo tajia odico to huruk do hirro inno hekilak. 26Obe ifa inyeja osiru to Kristo hetigiamari hirro inne anyar lojiŋak to lobie nohonyie. 27Etiara ifa do Musa many ohu to hekilak, eloitok ifa Yesu to hosie hirro innafa lofwo hidoŋ to honyie.

28Ifa lafanu isieja aŋhati ha haŋ nafa lofuye isieja, ette Yesu loton iya ohu einno alamarai. 29Hati ebo isieja ebusak inyeja heno ette hijo to honyie, “Itolojo daŋ hohoi,” nyo eno ifa hira iŋalio.” Ette Yesu eno hittole hosie.

30Ifa lettole inyeja daŋ hosie, ette isieja daha, ŋadumu inyeja immune ejok ette hiso do hosie. 31Ette honyiehite innohosie ŋa, ifa eyien isieja inyie ette inyeja lite tere hosie kwak. 32Eijo to kwaite innohosie, “Obe ifa owuon iya owulo hima to tajia innohoi nafa erarari inyeja de iyohoi to hikoi ette elimak Hiram no to Bibia”

33Ette isieja diote ta far nyie ette ŋacohari a Yerusalem, orrumu luha tomon ho loboite losuduha anoboite ojo illafa owuon daŋ hosie. 34Ojo aŋebuhu Habu dede, olieu do 35Simone.” Elima isieja hirro daŋ innafa eidoŋ de ikoi, iko hetuhutek no Yesu to hosie to hibun to nohonyie immune.

36To hiro nohosie hirro nuha, oweita Yesu tokwan do hiji nohosie, “ojo do hosie, hifwonya dahatai. 37Hati eikikiro ifa isieja ate wana ho baŋi iyya inna lowolo isieja loholio.

38Ojo Yesu do hosie, “Howon jai lefanu hifia te tajia innahatai?” 39Itiwolo has inneti ojo hejek inna naŋ. Ara naŋ ta kwan nieti. Hoiraf naŋ tiwolo. Obe loholio owon ho kwan ho hoit, “Iya lowon da hanaŋ.” 40Ifa ŋalatohu hirro nie etihutek inyie isieja has ho hejek innohonyie.

41Hati arrasa isieja wana ho munoi, ojo hililiha, ojo Yesu do hosie, “Iwon itai ho nobo daha?” 42Esio isieja inyeja hami no lomuda. 43Adumu Yesu ette hinya do hosiere hosie.

44Ette inyeja hijo do hosie, “Nafa halawuon naŋ ho itai, elimak ifa naŋ daŋ hijo egioro to ifahita inno Musa, iko hekilak hijo anyar oten to Hidolita.”

45Ette inyeja hiŋa hosi innohosie, “Innaŋ eigioro, hijo anyar liyen itai Hiram no Bibia. 46Ette inyeja hijo do hosie, “Egioro hijo, eitigema iso Kristo einyak ŋaibuhu toye da far itahunihi. 47Hibo na hiyeta ho ŋaibusahini no hiyeta anyar etiyena ŋaibuhu no honyie da masik, bi daŋ eitiara do Yerusalem.

48Irra ittai asuuti inno hirro hunna. 49Towolo efahu na iterit no Monye hanaŋ da hatai, ati da hatai, hati itila do bore gala many ottuni golon te ido.

50Ette Yesu edihori isieja aŋati ho Betania. Ette inyeja hikaf has innohonyie ahide, ette hijok isieja. 51Ta nafa lajahari inyeja isieja, ette ŋaibusari nyo aŋaino ifa inyeja a ido.

52Niya, ette isieja hitihabwo, ette acohini a Yerusalem ho munoi nolobolo bino. 53Oduloi ifa isieja da Haji Imojit, illa lajaha Hollum.